Ҫӗнӗ Шупашкарти ҫухалнӑ арҫынна пиллӗкмӗш кун шыраҫҫӗ. Тӑванӗсем "Лиза Алерт" шыравпа ҫӑлав отрячӗн хастарӗсенчен пулӑшу ыйтнӑ.
36 ҫулти Сергей Сергеевич Кислицын пуш уйӑхӗн 2-мӗшӗнче килтен тухса кайнӑ. Унтанпа вӑл килсе курӑнман. Тӑванӗсем вӑл ӑҫта пулнине пӗлмеҫҫӗ.
Сергей Кислицын 170 сантиметр ҫӳллӗш, имшеркке кӗлеткеллӗ. Ҫӳҫӗ ҫутӑрах, куҫӗ симӗс тӗслӗ.
Сергейӑн уйрӑм паллӑ пур: сулахай алли ҫине татуировка тунӑ.
Ҫухалнӑ кунхине хура куртка, хура ботинка, тӗттӗм кӑвак шӑлавар тӑхӑннӑ пулнӑ. Ӑна курнӑ тӑк полицие шӑнкӑравлама ыйтаҫҫӗ.
Ҫӗнӗ Шупашкарта сусӑр хӗрачана пӗр талӑк шыранӑ. Вӑл пуш уйӑхӗн 3-мӗшӗнче 16 сехетре ҫухалнӑ. Вӗсем урамра асламӑшӗпе /е кукамӑшӗпе/ уҫӑлса ҫӳренӗ. Тӑрук хӗрача унран тарнӑ.
Хӗрачана йӗрке хуралҫисем кӑна мар, нимеҫӗсем те шыранӑ. Ӑна пӗр талӑкран ҫеҫ тупнӑ.
Ирхине Шупашкар еннелле каякан водитель ҫул хӗрринче хӗрача ларнине асӑрханӑ. Вӑл ӑна полици уйрӑмне илсе ҫитернӗ. Хӗрачана пульницӑна вырнаҫтарнӑ. Унӑн кӑмӑлне лӑплантармалла.
Ҫакӑ паллӑ: хӗрача тӗлӗшпе нимӗнле преступлени те туман.
Ӗнер, пуш уйӑхӗн 4-мӗшӗнче, Чӑваш Енӗн ГКЧС председателӗ пулма Сергей Павлова шаннӑ. Ку пукана шанса париччен вӑл председателӗн заместителӗ – территори оборонин тата мобилизаци ӗҫӗн секторӗн заведующийӗнче ӗҫленӗ.
Сергей Павлов 51 ҫулта. Унччен вӑл Шалти ӗҫсен министерствин тытӑмӗнче ӗҫленӗ. Участковӑй, дознаватель пулса тӑрӑшнӑ. 2009 ҫулта ӑна Шупашкарти Ленин районӗнчи милицин 1-мӗш пайӗн пуҫлӑхӗнче ӗҫленӗ, 2011 ҫулта Шалти ӗҫсен министерствин Ҫӗнӗ Шупашкарти уйрӑмне ертсе пыма тытӑннӑ, 2013 ҫултанпа — Шалти ӗҫсен министерствин Шупашкарти уйрӑмне.
Пулӑ тытма юратакансен "Пулӑҫ - пулӑҫа" спорт фестивалӗ кӑҫалхипе 18-мӗш хут иртмеллеччӗ. Анчах ҫанталӑка пула ӑна йӗркелемӗҫ. Кун пирки Ҫӗнӗ Шупашкар хула администрацийӗн пуҫлӑхӗ Дмитрий Пулатов Инстаграмри страницинче пӗлтернӗ.
Вӑл каланӑ тӑрӑх, Шупашкарти шыв управӗнче пӑр ирӗлме, тапранма тытӑннӑ. Ҫавна май хула администрацийӗн пуҫлӑхӗ фестивале хутшӑнакансене хӑрушсӑрлӑхпа туллин тивӗҫтерейменнине палӑртнӑ. Фестивале ҫитес ҫула куҫарма йышӑннӑ.
Палӑртмалла: ӑна Ҫӗнӗ Шупашкарта 2000 ҫулсен пуҫламӑшӗнче ирттерме тытӑннӑ. Пӗр хушӑ фестивале йӗркелеме пӑрахнӑ. Пӗлтӗр каллех ирттерме тытӑннӑ.
2021 ҫулхи утӑ уйӑхӗн 8-мӗшӗнче Ҫӗнӗ Шупашкарти ҪҪХПИ экипажӗ патне арҫын чупса пынӑ та машинӑра арӑмӗ тата тин кӑна ҫут тӗнчене килнӗ ачи пулнине пӗлтернӗ, пулӑшу ыйтнӑ. Пепкен кӑвапине те касман.
Инспекторсем ҫухалса кайман, часрах васкавлӑ медпулӑшӑва шӑнкӑравланӑ. Амӑшӗпе ачине пульницӑна ҫити ӑсатнӑ. Вӗсене тухтӑрсен аллине парсан ҫеҫ каялла ҫаврӑнса кайнӑ.
Пепкепе амӑшне киле кӑларнӑ чухне вӗсене пулӑшнӑ полици лейтенанчӗ Сергей Арсентьев тӗрлӗ сӑлтава пула ҫитеймен. Анчах вӗсем пирки вӑл манман. Ҫӗнӗ ҫул хыҫҫӑн полицейски Сӗнтӗрвӑрри районӗнчи Черновсем патне ҫитсе килнӗ, пӗчӗк Викторийӑпа паллашнӑ.
Ҫемье ӑна ӑшшӑн йышӑннӑ. Киле кайма вӑхӑт ҫитсен вӗсем Сергей Арсентьева хресна ашшӗ пулма сӗннӗ.
Оперштабӑн черетлӗ ларӑвӗ иртнӗ. Ҫитес эрнере 5-8-мӗш классем мӗнле май вӗренӗҫ? Унта ҫакна татса панӑ.
Аса илтерер: Шупашкарти тата Ҫӗнӗ Шупашкарти ачасем кӑрлач уйӑхӗн вӗҫӗнченпе дистанци мелӗпе вӗреннӗ. Ҫӗмӗрлери тата Канашри шкул ачисем те ҫак мелпех ӑс пухнӑ. Ку кӑшӑлвирус сарӑлнипе ҫыхӑннӑ. Икӗ эрне каялла 1-4-мӗш, 9-11-мӗш классем парта хушшинче вӗренме пуҫланӑ.
Оперштбра пӗлтернӗ тӑрӑх, ҫитес эрнерен 5-8-мӗш классем шкулта парта хушшинче вӗренме пуҫлӗҫ. Вӗренӳ министрӗ Дмитрий Захаров пӗлтернӗ тӑрӑх, пӗр эрнере шкул ачисен хушшинче чирлекенсен йышӗ 200-тен 100-е ҫитнӗ.
Автобуспа республикӑри 1720 пурӑну вырӑнӗнчен 1068-шне (62%) ҫитме пулать. Кун пирки Чӑваш Республикин Транспорт тата ҫул-йӗр хуҫалӑх министерствин пресс-служби пӗлтерет.
«Ҫыхӑнура» портал палӑртнӑ тӑрӑх, 1068 хисепе «Чӑвашавтотранс» пысӑк предприяти ӗҫленӗ чухнех, 2013 ҫултах, пӗлтернӗ.
Минтрансӑн пресс-релизӗнче палӑртнӑ тӑрӑх, иртнӗ ҫул Чӑваш Енӗн тӗп хулинче тата Ҫӗнӗ Шупашкарта кивелнӗ троллейбус паркне улӑштарас ӗҫе пурнӑҫланӑ. Чӑваш Ен электротранспорта сыхласа хӑварнӑ йышлах мар регионсенчен пӗри пулнине палӑртнӑ. Троллейбуссемпе турттарнӑ пассажирсен шучӗ 2020 ҫулхипе танлаштарсан ӳснӗ.
Ҫӗнӗ Шупашкарти Совет урамӗнчи 9-мӗш ҫурт адреспа вырнаҫнӑ общежитире пушар алхаснӑ. Ку нарӑс уйӑхӗн 23-мӗшӗнче 13 сехетре пулнӑ.
Ҫулӑм общежитири пӗр пӳлӗмре тухнӑ. Унта кравать ҫунса кайнӑ. Ҫулӑм шалти отделкӑна та сиенлетнӗ.
Пушарнӑйсем вырӑна часах ҫитнӗ. Вӗсем кӳршӗре пурӑнакан тивӗҫлӗ канури ҫынна, 61 ҫулти хӗрарӑма, урама илсе тухнӑ. Пӳлӗмри пушара 20 минутран сӳнтернӗ. Унта виҫӗ техника хутшӑннӑ.
Халӗ, Инкеклӗ лару-тӑру министерстви пӗлтернӗ тӑрӑх, ҫулӑм мӗнрен тухнине уҫӑмлатаҫҫӗ.
Раҫҫейре нарӑсӑн 21-мӗшӗнченпе кӑшӑлвируспа официаллӑ мар майпа чирлесе ирттернисене те QR-код пама тытӑннӑ. Чӑваш Енре кун пек майпа чи малтан илнӗ сертификат хуҫи шухӑшне пӗлтернӗ.
Мария Алексеева кӑшӑлвируспа пӗлтӗр чирленӗ. Анчах вӑхӑтра ПЦР-тест паманнипе анализ вирус пуррине кӑтартман. Нумаях пулмасть вӑл Республикӑри ӳтпе венерологи диспансерӗнче юн панӑ. Кӑтартӑвӗ Патшалӑх пулӑшӑвӗсен порталне тепӗр кунхинех килнӗ. Унӑн организмӗнче антителӑсем пурри ҫирӗпленнӗ. Каярахпа ҫавӑнтах вӑл сертификат илнӗ.
Кунашкал майпа QR-кода ҫур ҫуллӑха параҫҫӗ. Ӑна кайран тӑсма май пулмӗ. Юн анализне вара республикӑри 16 медорганизацире илеҫҫӗ. 11-шӗ — Шупашкарта, Ҫӗнӗ Шупашкарта — 1, 4-шӗ — районсенче.
Нумаях пулмасть Вӑрнарта типӗ сӗт туса кӑларакан савут ҫумӗнче айӑпланнӑ ҫынсем валли общежити туни пирки пӗлтернӗччӗ. Унта вӗсем ӗҫлесе пурӑнӗҫ. Общежитире ҫывӑрмалли краватьсем, душ пӳлӗмӗ, кӗпе-йӗм ҫумалли вырӑн, кухня пур.
Айӑпланнисем валли юсанмалли центр татах уҫӑлӗ. Вӑл Ҫӗнӗ Шупашкарта пулӗ. РФ Президенчӗ Владимир Путин хушӑвӗпе килӗшӳллӗн, кӑҫал кашни регионта айӑпланнӑ ҫынсем валли 400 ӗҫ вырӑнӗ туса памалла. Вӗсем валли ӗҫ вырӑнӗ тума хатӗр усламҫӑсене патшалӑх бизнеса тытса пыма пулӑшӗ.
-2.7 °C